新鴻基地產（016）低調慶祝上市40周年，只400蚊聚餐津貼是畀員工，冇特別息，股東冇得益，但唔緊要，1972年有好多老牌地產商上市，包括長實（001）、新世界發展（017）同鷹君（041），佢哋嘅股東可以期待吓有冇40周年股息收。
新地低調 新世界熱鬧
咁多老牌地產商今年要慶祝上市40周年，腦海即時響起「齊歡唱，同慶賀……」呢首粵語長片片尾歌。翻查資料，1969年遠東會成立後，開展四會時代，打破英資壟斷，更多華資企業有機會上市集資擴充業務，李嘉誠、鄭裕彤、郭得勝等大孖沙紛紛選擇1972年上市。新地當年上市集資1億咋，家1億淨係買到一個豪宅，40年前就係天文數字，新地利用集資嘅1億，再問銀行借1億，買到29個地盤發展，公司市值由4億變成今日2800億。大股東郭氏兩兄弟炳江炳聯偏偏喺今年惹上官非，難怪要低調慶祝。反觀另一隻老牌地產股新世界發展，創辦人彤叔今年初退休，交棒畀阿仔鄭家純同個孫鄭志剛，聽講，新世界內部家諗緊喺11月慶祝上市40周年，可能發大來搞得熱熱鬧鬧。無獨有偶，1972年成立嘅太古地產（1972）亦可能有慶祝活動。華華希望年尾港股醒神啲，交投旺番，配合埋呢啲慶祝活動，股民真係可以齊歡唱、同慶賀啦。李華華mailto:[email protected]