美國男子籃球隊喺倫奧以狂風掃落葉姿態攞走金牌，無敵程度令人諗起當年嘅「夢幻一隊」。所以《NBA2K13》就搵來足本「夢一」同今屆美國隊打番餐！除此之外，今次台灣發佈會更介紹咗加入唔少新元素嘅「My Career」模式，打波之餘，更要顧埋場外行為，夠晒真實投入！
記者、攝影：韓繼聰
最強對最強 經典鬥當打
小記作為NBA粉絲，今次可以獲2K邀請到台灣參與最新《NBA2K13》發佈會當然興奮，在場除台灣記者外，亦有來自香港、韓國等媒體，場面熱鬧。新一集《NBA2K13》有唔少新元素加入，但最吸引又最有話題性，當然就係加入咗足本原班人馬「夢一」同今年嘅美國隊嚟個大對決！為咗成就呢個夢幻對決，2K不惜工本攞齊「夢一」球星如佐敦、柏賓、魔術手莊遜等肖像。邊隊勁啲？試玩之下都係覺得「夢一」較強，可能係老一輩情意結啩。另外，今集亦加入唔少其他經典球隊，例如「戰神」艾佛遜單天保至尊嘅76人，仲有「鬼見愁」莫寧嘅黃蜂等，老一輩球迷應該會玩得好興奮！
RPG元素導入 打拼事業高峯
老一輩玩經典隊興奮，新一代自己打入NBA亦夠過癮，以前嘅「My Player」模式最多都係畀你整樣貌、身形、能力等，打法其實無咩特別。嚟到今集就豐富得多，「My Career」模式中你可以由街波打起，等人賞識請你入隊，賺到錢可以買衫買慶祝、打氣動作，建立個人形象，買裝備提升能力，甚至買特殊技巧左右戰局。場內爭表現，場外更要識得同記者、教練互動，寸嘴啲分分鐘唔俾你出場兼唔同你續約，十足十玩RPG一樣，相當創新抵死！
JayZ參製滲音樂元素
《NBA2K13》仲有一大特色，就係著名HipHop歌手JayZ加入製作，令遊戲加入唔少音樂元素，好似過場動畫就加入咗JayZ 嘅MV，相當有型。不過更特別嘅係今集新加入嘅明星入樽賽，玩法恍如「結他機」一樣，要跟節奏㩒掣，㩒啱先可以成功入樽，非常新穎搞鬼！另一抵死位係Xbox版加入Kinect聲控，可隨時叫隊友上嚟幫手單擋走位，雖然現場無得試，但諗起都已經覺得吸引，十足打真波一樣。
《NBA2K13》
Xbox360 / PS3 10月5日開始發售
