噚日先講完低息環境令磚頭有價，內房股即刻接捧炒上，中國海外（688）同埋潤地（1109）齊齊創52周新高，噚日10隻藍籌地產股，有5隻破頂，認真巴閉。至於噚日推介嘅英皇孖寶，英皇娛樂（296）微跌一格，英皇國際（163）逆市再升近4%。有戰友提醒唐牛，今年係英皇集團成立70周年，隨時有機會派特別息，後市又多一個催化劑炒上。既然內房股有勢，今日就推介另一隻成功破頂嘅世房（813）。世房早前公佈，8月份合約銷售額40.4億人仔，按年勁升兩成，按月都有輕微增長。首8月個總銷售額高達306億人仔，佔全年目標99.5%，銷情冠絕同業，調高全年銷售目標只係時間問題。睇圖表，世房連續兩日企穩前浪頂13蚊，短線突破已確認，成交亦配合，噚日收報13.24元，升1.69%，戰友可候回試13元水平吸納，中線回報一成應冇問題，跌穿12.20元止蝕。唐牛