日本政府買釣魚島，令來港拍特別版《金田一少年之事件簿》嘅演員山田涼介、川口春奈同有岡大貴前日喺北角俾愛國阿伯鬧，但佢哋嘅香港fans都唔少，前晚就有百幾個粉絲去銅鑼灣渣甸街一幢唐樓等佢哋，當中唔少係着住校服嘅學生妹㖭。
吳尊扑親頭
前日傍晚6點幾，三名日本演員一早到咗，到7點等埋徐若瑄同吳尊，佢哋就落車上樓開工，成班fans一擁而上，嚇到徐若瑄有啲驚，工作人員好似打排球咁，舉起手築長城掩護班演員，不過吳尊收禮物時唔小心扑親頭。佢哋喺唐樓露台拍攝，至凌晨至收工。到噚日朝早7點幾，《金》劇演員又去九龍城嘅九龍寨城公園取景，有半百粉絲晨咁早探班，當中竟有《天與地》嘅「少女阿Yan」蔣家旻，佢話陪朋友嚟，講到尾佢先認自己係山田涼介嘅粉絲！
採訪、攝影：李志明、彭琮然、羅德光
