【本報訊】特首梁振英早前推出「梁十招」穩定樓市，但樓價不跌反升，就連一向對政府態度溫和的新地（016）亦「睇唔過眼」暗寸政府，提出三項建議，包括發佈兩至三年中長遠房屋供應和加快樓花審批程序。
記者：陳新政、林志光
昨日在新地業績會上，雖然聯席主席郭炳江和郭炳聯月前被廉署正式拘捕後出席發佈會，會上曾被傳媒問及最近政府的新房策意見時亦輕輕帶過，但發佈會將近完結時，郭炳江「主動」話仲有嘢講，並拿着一張疑是事先安排的講稿。
有備而戰有嘢講
郭炳江指出，政府應該加快建築圖則及預售樓花審批程序，「以往起樓要用4至5年，但家要用5至6年，起樓慢咗，供應咪少咗。同埋我覺得起多啲公屋同居屋冇問題，仲可以加大資助性房屋力度。」他又說，「大家都估吓估吓咁，唔好講有幾多樓可以賣，究竟有幾多地可以供應出嚟起呢？」暗示政府只提建屋量不提土地供應量，市場資訊不足，呼籲增加透明度，他認為房屋政策最好的方法，是從土地供應着手，但賣地時間及數量必須因應經濟而調整。
屯門新樓盤瓏門開售價高達1.1萬元的誇張呎價，可以看出新地的確無視「梁十招」的影響，儘管郭炳江強調公司不是與政府「對着幹」，但他卻對政府提出「個人意見」，以表達對土地政策的不滿，「政府喺勾地表入面，未來兩年甚至三年，約有幾多單位，喺邊一區有幾多，可以列明清楚出嚟，俾大家知道房屋供應，唔會話有太大變化，等市場有個訊息同更加清楚，有更多透明度，好似今日大家都估吓估吓。其實政府可以講未來5年嘅計劃，唔好講有幾多樓可以賣，究竟有幾多可以供應出嚟，可以起呢？」
對於新地建議加快預售樓花審批和加推資助房屋的建議，政府昨未有回應。至於建議應披露未來兩至三年住宅供應量及資料，運輸及房屋局發言人回應指，現時已透過運房局的網頁公佈每季一手樓的供應資料。
其他發展商認同
其他發展商亦認同新地「建議」，會德豐（020）常務董事黃光耀說，政府現時批出樓花預售的時間，一般要9至12個月不等，「需時的確頗長，如能在半年批出會較理想。如能再定期詳細公佈未來數年住宅單位供應，包括各區的動工量等，讓發展商及市民都能更準確掌握供應數字便更好。」
南豐發展董事總經理蔡宏興亦表示認同，「（樓花預售批文）家都等得好耐下，各部門小心咗，隨時兜多一輪圈。希望可以快啲，多啲樓賣，市民都容易安心上車買到樓，如果公佈未來1年嘅分區住宅供應該會準確，對市場幫助較大。」
新地反駁梁十招
【梁十招部份政策（8月30日）】
．加快審批預售樓花申請，涉及1萬個單位
．出售剩餘830個天水圍居屋單位、「置安心」青衣項目約1000個單位轉租為售、改建及重建工廈作住宅用途，提供約360個公屋單位
．下季推出共2650個私人住宅單位
【新地建議】
．應再加快預售樓花審批程序
．政府要加大力度推資助性住房
．應披露未來兩至三年住宅供應量及資料，增透明度
