方力申養了兩頭異國短毛貓，就是怕一隻太寂寞，他坦言將來做了爸爸，都不會只生一個子女，更擔心若萬千寵愛在一身，變了慈父多敗兒。小方的兩隻愛貓完全不同性格，「BB」會做阿四用貓爪幫他按摩；「肥妹」就教極都不懂在貓沙上小便，更曾在小方床上撒尿。
撰文：皓騫
方力申跟家人同住，由於工作很忙，七、八年前買了一隻灰白色的異國短毛貓，鍾意牠鼻扁扁似加菲貓，取名「BB」陪父母解悶，後來，他怕BB獨個兒會悶，買了同種的靚女「肥妹」作伴，家裏有兩隻貓後變得熱鬧，小方說：「我怕BB一隻貓會悶，所以將來生小朋友，我都唔會生一個咁少，起碼要兩個，有伴好啲，尤其呢個年代，好容易寵壞小朋友。」
捉麻雀玩餐飽
雖然兩隻貓年紀相若，但方家上下都是較偏心BB，小方笑說：「因為BB聰明啲，佢會用手仔幫你按摩，但唔鍾意俾人掂，掂得耐會咬人，雖然平時唔多黐人，但一嗲就令人好冧，佢仲識睇眉頭眼額，成日挨住你。相反肥妹就好鍾意叫我幫佢痕，有時老竇睇緊報紙，肥妹會拉低張報紙要老竇幫佢痕；肥妹由三個月大開始養，但到家佢仲喺報紙屙尿，教極都唔識用貓沙，有時仲會周圍屙，試過屙喺我張床上面，鬧佢就匿埋一邊，而且，除咗貓糧之外，佢乜嘢都唔食，完全唔識享受，BB就鍾意食乳酪、雞肉同魚。」
因為得寵，BB在方家惡晒橫行霸道，有時甚至會欺負肥妹，小方說：「BB係屋企第一隻養嘅貓，佢當自己係大家姐，成日想推開肥妹，有時我哋鬧完BB，佢會咬肥妹出氣，所以成日都要分開佢哋，不過BB見到陌生人就驚，每次有親友嚟屋企，佢就好似門口貓咁匿埋；反而肥妹就好惡，遇外敵會挺身而出，試過有麻雀飛入屋，肥妹會咬住捉佢。」
險墮樓嚇破膽
劉嘉玲和胡軍拍過部電影叫《好奇害死貓》，原來可以套用在BB身上，還幾乎令全家人嚇破膽，小方說：「以前租屋住冇窗花，我哋住九樓，有次BB試過差一步跌落街，嚇到老竇即刻捉佢入屋，佢好驚BB有乜嘢事，一定俾媽咪鬧死，媽咪當咗啲貓係孫女，如珠如寶，平日都同佢哋講BB話，之後全家都養成習慣，屋企唔會開大窗，怕貓貓會跳落街。」
雖然方媽媽好錫兩個「孫女」，但牠們還是愛黐小方，他笑說：「可能佢哋係貓女，所以鍾意跟我，不過貓只有幾分鐘記性，有時我去咗外地做嘢，離開香港幾個禮拜，返嚟佢哋就會唔記得我，好似唔識我咁，要重新培養感情。」
BB
年齡：7歲
品種：異國短毛貓
性別：雌性
肥妹
年齡：7歲
品種：異國短毛貓
性別：雌性
狂影寫真收藏
方力申空閒最鍾意幫兩隻愛貓影寫真，多年來已經有數千張相，他說：「以前我仲會幫佢哋冲凉，但獸醫話貓唔好冲凉，每日梳毛就足夠，所以家乜都冇幫佢搞，交晒畀工人，佢哋都係黐工人多啲，有時工人喺廚房做嘢，兩隻貓都會走入去陪工人。」
小方覺得愛貓肥妹比較靚女，雙眼似成一直線，品種夠純，問到會否幫牠配種？小方說：「冇，因為獸醫話絕育健康啲，不過將來再養，我諗住畀佢哋生後代。」
