恒隆地產（101）主席陳啟宗一向寸嘴，平時喺公開場合都係有乜講乜，亦習慣喺公司年報洋洋灑灑整篇「董事長致股東函」，講公司發展情況，新近連中期報告都寫埋，字裏行間都係不停認叻同寸分析員。
自詡沽貨時機準
陳啟宗喺報告內不停流露「一切盡在掌握之中」嘅氣勢，包括之前忍手唔買地、家陣可以執平貨、瀋陽新場租務好到不得了等等，最架勢係佢揀啱時間賣非核心物業，上半年沽咗兩件（應該講緊葵涌紅A中心同長沙灣百佳商業中心）賺咗2.2億。佢重申，會繼續沽香港嘅非核心物業，呢啲物業樓齡高，唔喺中環、銅鑼灣或者旺角黃金地區，雖然係咁，但依然有好多買家接觸公司，唔憂冇人要咁話！佢又寸大部份分析員低估恒隆出售物業嘅邊際利潤，仲話已經多次提點，都冇人留意！睇嚟陳啟宗已經由用心良苦走到發火邊緣，各位分析員真係要豎起耳聽清楚。