民主黨雖然在立法會直選失利，導致黨主席何俊仁含淚辭職，但分裂嘅民主派仍然有18個直選議席，再加3個超級區議會議席（雖為功能組別，實與直選無異），加上在功能組別方面，莫乃光力退譚偉豪（資訊科技界），郭榮鏗擊敗王桂壎（法律界），梁繼昌贏咗林智遠（會計界），加上社福界張國柱，教育界葉建源，衞生服務界李國麟，一共有六個功能組別席位，於是泛民在立法會加加埋埋一共有27席，超過七十席之38%，令全體點票方面，建制派不能有三分二大多數，難以夾硬通過一啲有極大爭議性議案。泛民仍有18席，佔直選議席之51.4%，恰好佔過半數，政府亦冇法子夾硬嚟。一位高人對左丁山講：「民建聯雖有配票神功，獲得大勝，但仍然打破唔到僵局，西環唔會太過開心，況且民建聯與工聯會在競選時有互相配票，亦有互相搶票，搞到陳婉嫻由大熱門票后變成第四名，票數輸埋俾民建聯李慧琼，背後黑口黑面，而王國興只能險勝，新東葉偉明墮馬，民建聯與工聯會開始有政治心病咯。睇怕今日選舉之後，北京會向西環問責，西環出盡九牛二虎之力，加上配票神功絕技，仍然未竟全功搶得直選過半，總體過三分二嘅目標，要檢討咯。」今次資深議員落選者有余若薇、陳淑莊、張文光、李永達、黃成智、葉偉明、劉健儀、劉江華，退選嘅有李華明，還有功能組別嘅詹培忠、李國寶、吳靄儀、陳茂波、霍震霆等共十八人，再加新人葛珮帆、陳志全、張超雄、范國威、梁志祥、陳恒鑌、麥美娟、郭家麒、胡志偉等新人，立法會可說大換班，磨合需時，恐怕立法會復會後頭六個月行事不暢順，啲高官有排頭痛。梁振英新班子面對新人咁多嘅立法會，激進派更多嘅立法會，好難有運行咯，故此左丁山敢大膽預測，未來一年香港特區政府難有作為，冀望政府帶領經濟走上新方向者，一定失望。（按：一位讀者Q來電郵話有人在票站收到三張選票，是何原因？左丁山眼見票站內投票選民只收到兩張選票，恐怕讀者Q所見，乃係票站職員搞錯而已，應該別無原因。）