繼新界東陳志全慢必出櫃之後，連啱啱喺新界西勝出嘅禮義廉陳恒鑌都出櫃。不過同慢必唔同，陳恒鑌嘅同志身份係拜阿爺所賜，內地網頁「踢爆」，陳恒鑌原來喺「安徽省政協」，仲以「同志」呢個暱稱嚟稱呼佢。原來陳恒鑌年紀輕輕已經咁紅，難怪阿爺畀佢上位啦。陳恒鑌噚日同禮義廉主席譚耀宗和落選嘅劉江華去荃灣謝票，記者問劉江華，禮義廉日後冇咗佢呢個重炮手喺立法會坐鎮點算，皆因佢出咗名唔怕爛臉抹黑泛民。劉江華就指住陳恒鑌話，有呢個輕炮手都頂得住。陳恒鑌當然唔敢寸嘴，擦晒鞋話要向前輩多多學習，有前途！