官恩娜（Ella）同前公司Boombeat Music解約之後，上個月簽咗華納，頂替薛凱琪（Fiona）嘅一姐位，Fiona就去咗黃柏高嘅太陽娛樂。上星期，Fiona谷行咪咪大鑼大鼓加盟新公司，相反，華納到家都未幫Ella開記者會宣佈加盟，只係派助手跟Ella出席公開活動，表現相當低調。馮仁昭收到風，Ella喺前公司同無綫簽落嘅歌手合約，到12月先屆滿，而佢幫無綫拍嘅劇集《雷霆掃毒》仲未播，因為華納屬於四大唱片，雖然佢哋同無綫嘅版稅問題已解決，但合約問題仍然冇得傾，華納歌手唔簽約就冇得上無綫。華納為免Ella尷尬，寧願等佢約滿無綫，先開記者會公佈加盟。馮仁昭向華納求證，發言人例牌話唔關敏感事，只係想等Ella出碟先開記者會宣佈加盟啫。
新劇宣傳片被飛
無綫方面亦好頭痕，決定安排《雷霆掃毒》喺9月24號播出，趕及Ella約滿前播完，聽講之前無綫本來想搵Ella唱片尾曲，主題曲就由同劇嘅林峯演繹，好在Ella嗰排冇時間錄音咋，否則可能連歌都要抽起！不過，無綫為咗唔幫四大歌手，《雷》劇嘅宣傳片本來有Ella嘅大側面，但最近都狠心剪埋，身為女主角嘅佢連一個shot都冇，都算慘情！