奧雲仔返嚟嘞！人間蒸發咗3年，唔係，喺曼聯坐冷板坐咗3年先啱，奧雲今季以自由身加盟史篤城，周六晚好有機會幫新球會上陣，主場迎戰曼城；俾人投閒置散，鬱埋鬱埋成3年，奧雲今次要爆發嘞！
獲新拍檔高治大讚
09年，奧雲拒絕史篤城嘅邀請，走去做反骨仔加盟曼聯，結果嘥咗3年時間，加埋得6次英超正選；兜兜轉轉，32歲嘅昔日金童始終都投向史篤城嘅懷抱；喺嚟緊主場對曼城嘅比賽，奧雲好有機會首次披甲。同樣踢過利物浦、家係史篤城主力射手嘅高治，就睇好奧雲可以鹹魚翻生，「如果米高可以長踢正選又有入波，佢完全可以入番英格蘭國家隊。」翻查數據，史篤城自08年升上英超後，主場都未輸過畀曼城；我求大俠就睇吓奧雲會唔會發威，幫球隊擊敗曼城。
紅魔新左閘或擔正
曼城嗰邊有射手阿古路復操，但話晒傷咗成個月，相信領隊文仙尼唔會派佢對史篤城，會留到下周二作客皇家馬德里嘅歐聯先至畀佢出場。文仙尼喺轉會窗完結前買咗堆新人返嚟，包括前鋒史葛冼佳亞、中場查維加西亞同右閘馬爾干，佢哋都有機會喺今仗處子登場！
除咗尹佩斯同香川真司，曼聯仲有法國左閘艾拉受傷，或會喺周末缺陣。趁今場對手韋根唔算好強，加上下周三要喺歐聯對加拉塔沙雷，曼聯正好畀艾拉唞吓，試用今季喺荷甲買番嚟嘅新仔阿歷山大畢拿。聽曼聯球探講，佢只係荷甲第4勁嘅左閘；我求大俠都未睇過佢踢波，周六晚就可以睇吓辦！
史雲斯方面，左閘尼爾泰萊斷腳收「咧」，臨急臨忙簽咗迪安達里。呢位替工家26歲，係前荷蘭小國腳，上季踢川迪。不過史雲斯都有情有義，諗住同尼爾泰萊在內嘅幾位球員續長約。另外富咸放走中場核心迪比利後，簽咗35歲嘅希臘老將加拉高尼斯返嚟，聽晚大家都機會睇到佢嘅表現。
