要有叛逆精神，才能勝任需要想像力的職業。中學時在校內「曳到出名」的葉望風，偶然看到親友把一顆骰仔輕輕一搖，數字就神奇地轉變了。魔法把曳仔降伏，練習魔術令他做事專注，去年更在無綫《魔法擂台》當選觀眾最喜愛的魔術師。他在中大文化研究系畢業後決意當全職魔術師，一切看似脫離常軌，但對他來說卻正常不過。
記者：吳淑義
「我叫葉望風，1989年底出世，今年23歲，屋企係正常幸福家庭，但我由細到大都好曳，讀九龍培正中學時仲帶領同學作弊，結果俾學校記大過。
約六、七年前一次家庭聚會，舅父用一粒普通骰仔表演，搖兩搖啲數字就唔同咗，好神奇。我哀求佢表演咗好多次，但都睇唔到破綻，最後佢講個秘訣畀我知。
睇書練習變得定性
我後來先知道，魔術界有三大戒條，包括唔可以喺同一班人面前重複表演，唔可以無條件講秘訣，亦唔可以喺表演前講答案，舅父為我打破咗兩條，好多謝佢令我成為魔術迷。
為咗學魔術，我不斷睇書、買道具同練習，個人反而定性咗，大學論文係《Passion and Magic》，我嘅人生已經同魔術分唔開。
識玩魔術會表演畀朋友睇，可以改善溝通技巧，好多人問我學魔術係咪好易追到女仔，如果係真，咁全香港男人都識魔術啦！我嘅女朋友就係唔鍾意睇我表演，反而吸引到我，總之易啲識人，但追唔追到就睇人囉。
魔術要喺邏輯之內做不符邏輯嘅事，雙手靈活度可以練習，但最重要係有想像力。破綻可分三種，一係自己知，觀眾唔知，仲可以暗裏補救；二係自己知，觀眾都開始知，就要盡力控制氣氛；第三種係喺觀眾前完全穿崩，我只係試過一次，最重要係保持自信同控制場面，唔好停喺尷尬一刻，笑一笑就過。
去教書退休會後悔
家嘅社會已經高度發展，八、九十後想爭上位都冇咁易，年輕人寧願做自己鍾意做嘅事。如果要追尋夢想，每個人都應該有狂熱喜愛嘅事，從中再發展。
我有諗過教書，但如果呢刻唔做魔術師，我諗退休時一定後悔。香港嘅職業魔術師不足100個，靠表演、教班或者出道具賺錢，我出道時已有知名度，暫時收入係好過教書，我嘅理想係做第一個魔術師喺容納幾千人嘅場地開show，會畀三年時間自己去做，如果唔得先再諗第二樣。
魔術師薩斯頓三戒條
1.不可在同一地點向相同觀眾表演兩次
2.不可無條件告知別人魔術秘訣
3.不可預先告知結果
葉望風魔術成績
2011年
FISM世界魔術聯盟亞洲冠軍賽：亞軍
香港近景魔術公開大賽：冠軍
TVB魔法擂台：我最喜愛魔術師、我最喜愛魔術組合
2010年
澳門國際魔術大賽：冠軍
香港近景魔術公開大賽：亞軍
杭州際魔術交流大會：銅獎