有幻想就有炒作空間，QE風繼續吹，港股一舉挾上2萬關，資金追捧本地地產股及公用股，「四叔」6月吹雞買地產股，果然有料到，坐到家陣起碼賺三成。不過，恒指5日漲近千點，已反映唔少利好因素，建議戰友可先獲利，睇清形勢下周再出擊。資金搵出路，具注資或賣盤概念的股仔集體瘋漲，本欄多次分析的南聯地產（1036）唔覺唔覺1個月翻了一番，市值已飆至近50億銀，規模逐漸成型。萬科高層講過想將南聯當REITs來做，若然成事，相信市值仍有再升空間。講起內地巨企入主本港殼股，要留意遠東環球（830）。該股從事大廈幕牆產銷，中國建築（3311）今年2月以每股1.18元全購，但維持上市地位，令遠東環球成為中國海外集團的一員，想必有後着。同系中國海外（688）及中海宏洋（081）分別主攻一二線及三四線城市，中建築就負責興建，如無意外，遠東環球將承接同系建築物的幕牆定單，提供一條龍服務，毛利率高，生意更源源不絕，前景相當好。遠東環球昨大成交異動，可視為炒上前奏，昨日觀察所見，阻力主要來自未來資產的蟹貨沽盤，但市場承接力強，料已大致消化，短線先睇1個月高位1.71元；中線可見2蚊樓上。魏力 http://www.facebook.com/2012jason