曾經有朋友話「錢財於我如浮雲」，當菲菲想寸佢扮清高時，佢即接下聯「浮雲於我如命根」。香港地生活艱難，就算幾唔恨錢，都想買層樓自住。不過家陣連藍田山上嘅公屋，496呎單位要210萬，呎價炒到4000幾蚊，人工追唔上樓價升幅，唔夠「浮雲」，恐怕有日瞓街做孤魂。港交所（388）噚日宣佈同CEO李小加續約，人工加7.5%，年薪升到808.8萬銀，平均每月67.4萬大元。即係咁，公務員今年都係加薪5.26%至5.8%；李小加上任後，港股交易時段就加咗，但成交金額有跌冇升，仲要搞到唔少細行做唔住。何解李小加值得加如此多？不過，李小加就算幾唔得股民心，都唔夠CY咁失民心。CY管晒全港，年薪大約400萬銀，啱啱好係李小加一半，大家係唔係即時順番條氣呢？照咁計，李小加年薪都買唔起4伙上述公屋，CY更只夠買1伙。CY猛話打擊樓市，樓價卻長升長有，索性減埋佢人工，等佢知道民間疾苦。Fifi本欄逢周二、四刊出