低息環境持續，磚頭價格更顯珍貴，從星獅地產（535）控權獲洽購，以及搞電子嘅永利控股（876）宣佈分拆投資業務上市，可見一斑。事實上，主要持有中港澳地產業務嘅英皇國際（163）及英皇娛樂（296），近排已見異動，跟炒一轉隨時有意外收穫。先講英娛，主要資產為澳門英皇酒店項目，最近大股東楊受成密密增持，成為股價向上嘅催化劑，截至今年3月底，手頭現金連定存有14億銀，相當於市值七成，夠晒穩陣，噚日大升8.4%，收報1.55元，大成交破足3個頂，要上NAV價1.63元應冇難度。嫌英娛PB折讓唔夠大，可以諗吓佢阿媽英皇國際，現價PB只係0.39倍，但手頭上件件正貨，最值錢當然係銅鑼灣核心地段──羅素街嘅一批商廈同地舖，以及灣仔一帶商廈寫字樓，另外仲有一籃子京滬澳項目等，由於物業價值水漲船高，現價PE只得1.5倍，平得可憐，假設PB上番0.5倍，可見2.38元，潛在升幅29%。唐牛