「I am nobody，我比一條蟲還要細。」舊時嘅世界拳王、強姦犯、吸毒男、酒鬼，泰臣噚日西裝一度同太太Kiki恩愛到場，出席君悅酒店內一個投資講座，刻意洗底營造「好男人」形象。25分鐘記者會，太太仔女不離口之餘，仲話自己家滴酒不沾，「負責任」呢3個字亦講咗不下4、5次，都喺想大家聽明白，舊時胡混嘅泰臣已死！
手舞足蹈平易近人
噚日係46歲嘅泰臣第一次喺香港公開露面，仲帶埋老婆仔女一齊嚟。泰臣以Tyrannic Productions CEO身份出席記者會，太太Kiki陪住入場同記者們say hi後，就留番老公獨自面對記者提問。泰臣一句普通話「謝謝」答謝在場記者用掌聲歡迎佢入場，令人十分受落；除咗臉上嗰個非洲部族圖案「面紋」仍有殺氣外，泰臣冇想像咁高大（5呎10吋），講嘢時手舞足蹈，都幾平易近人。
呢位過氣拳王曾叱吒一時，生涯據講賺成3億美元，不過喺92年試過被控強姦罪成入獄、97年幾乎咬甩荷里菲特耳仔，又試過破產；呢位喺58場比賽中有44場K.O.對手嘅拳王，可以話係毀譽參半。而佢場外亦多姿多采，結過3次婚，育有8名子女；而佢只得4歲嘅囡囡 Exodus喺09年意外死亡，估唔到佢喺女兒死後10日就娶現任太太Kiki。
「一切以家庭為重」
家泰臣殺氣盡斂，更用nobody呢形容自己，的確好似將舊時胡作非為嘅嘢拋諸腦後，重新做人。佢仲話自己曾經係「星球上最壞嘅人」：「我唔想再做以前嗰個我，家一切以家庭為重，係個負責任嘅人，尊重太太兒女，我想仔女都尊重我，家我會為自己感到驕傲。」
泰臣同前陣排訪港嘅NBA球星朗度有同一見解，都係話香港似足紐約人多車多，驚訝市區都見到山之外，亦不忘顯示「好男人」本色，佢話：「到家為止，我都係太太同仔女喺酒店房活動，未有出外觀光，今晚會出去食飯，希望可以同佢哋影多啲相留念。」