恒指無端端炒番上二萬點樓上，雖然成交未配合，但班炒友手痕好耐，有理冇理炒咗先算，聽到有乜消息，唔理堅定流，買咗先講，呢排電訊設備股落鑊，就係好例子。
事緣《爽報》周初獨家爆料，話內地電訊一哥中移動（941），已經批出首批4G手機定單，涉及金額達數十億人仔，傳聞中標嘅手機生產商，包括中興通訊（763）、中國無線（2369）同埋華為。
說話偽術空間大
報道出街後，中興同中國無線股價即刻聞雞起舞，當日中午，中興發言人接受彭博訪問時話有關報道「不準確」，但拒絕進一步置評。唔知炒友係咪聽得狼英說話偽術多，認為「不準確」唔代表「不正確」，所以照砌可也。
結果，中興同中國無線三日分別累升8%及14%，唔關事嘅京信通信（2342）更炒高23%。抄狼英嗰句，喺不準確與不正確之間，其實係有好大嘅炒作空間！