城中筍盤小小超李澤楷，原來真係好鍾意搵番城中筍盤幫手賣廣告！香港電訊（6823）舊年搵陳豪做網上行代言人，就連女股東都讚主席小小超英明，最近香港電訊推流動電話任講計劃，再接再厲，搵郭富城做代言人，睇嚟小小超真係好明白「筍盤」吸力幾咁強。
城城轉台做生招牌
電訊市場競爭大，生意難做，近年都好少見到有電訊商落重本搵明星代言做宣傳，十幾年前最經典咪係黎明嗰個阿May電訊廣告囉。所以呢，舊年小小超搵陳豪扮安裝員賣廣告，真係入晒屋㗎。
早排美國時裝品牌A&F喺香港開旗艦店，搵咗大班肌肉型男做宣傳，搞到中環OL癲晒，就知型男有幾大宣傳作用。
小小超應該好明白呢個道理，香港電訊新近為PCCW mobile推新計劃，就重施故技，搵城中另一位筍盤郭富城賣廣告，平面廣告噚日首日出街，城城只係攞住部手提電話影張相，都已經型爆，聽講遲啲仲有電視廣告。
諗番起97年郭富城幫one2free賣廣告，事隔十幾年先轉台幫PCCW做生招牌，都幾令人期待佢個新電視廣告，話晒都由男生變成鑽石王老五，另有一番味道吖嘛。
不過，小小超搵城城可能仲有其他原因，事關城城係小小超旗下「大國文化」嘅人，早排傳出城城份合約今個月到期，小小超攞一億留人，今次合作會唔會係續約成功嘅先兆呢？
李華華
mailto:[email protected]