以投訴嚟谷收視嘅《ATV焦點》再次食髓知味，繼「拜祭蔡元培」後，噚晚改向堆填區抽水，以「黎智英回來了」做主題，先鬧肥佬黎係無良嘅商人嘅人「版」（應該係「辦」先啱）。跟住又話肥佬作為反國民教育「頭面人物」之一，目的係為《爽報》「洗腦」掃清阻礙，「國民教育嘅宗旨無非係令青少年人成為有健全精神，試問，如果國民教育奏效，香港仲會有幾多人肯讀佢嗰張宣淫謀利嘅《爽報》呢？」難怪有網民即時留言話「亞視越來越離譜，簡直係走火入魔！」、「與其罵得佢咁勁，不如反省吓，做好《大公報》和《文匯報》吧」。