憑唱《他約我去迪士尼》喺網上出咗名嘅Kellyjackie（KJ），佢之前同經理人有合約糾紛，搞到七年冇碟出，仲得埋抑鬱病，上年先同musicNEXT簽咗三年合約，終於可以喺樂壇翻生，仲就快出新碟㖭。不過，馮仁昭收到風話KJ乜嘢都要跟同公司嘅區文詩比較，又要公司投放大量資源喺佢身上，加製作費同廣告費，至弊係公司要佢減肥，但佢又越減越肥，所以聽講公司都嫌佢麻煩，如果新碟銷量唔好，可能踢佢入冷宮，甚至考慮解約費事麻煩。
區文詩微博喊冤
噚日馮仁昭打電話問musicNEXT嘅總經理Kevin，佢好坦白咁話：「佢提出一線藝人嘅要求，公司明白佢好緊張，希望佢努力啲保持身形，減到100磅，仲搵埋瘦身贊助，但成績唔顯著。」問新碟賣得唔好，係咪會同KJ解約？Kevin話：「公司對藝人成績、合作態度好重視，如果唔配合，好難合作落去。」另外，餅碎區文詩前晚去咗新片《一路向西》首映，着住紅加藍衫嘅佢之後喺微博，自爆聽到有記者同朋友講：「見到個臭X、那邊穿着紅衫那個哦！」區文詩話唔會為冇禮貌嘅人動氣，不過，嗰個記者同傅穎好friend，區文詩喺微博玩踢爆：「撐朋友的人我很欣賞，但撐朋友撐到口沒遮攔，未免太低手了。」