英超車路士開季3連勝，粉絲之一嘅2010年桌球世界冠軍羅拔臣（圖），噚日喺尖東名將桌球城參加名將盃分組賽，以5:2贏中國代表梁文博，今日會同港將馮國威爭出線，佢一提起愛隊車仔就好興奮。「車仔管理層好想球隊變成英超嘅巴塞，不過我哋冇美斯，家我最鍾意夏薩特，佢夠快又好波。我就唔覺尹佩斯會令曼聯變得好強，最難打嘅對手依然係曼城。」
花名「金色轟炸機」、30歲嘅羅拔臣有成6呎2吋高，天生金髮又靚仔，可惜已經結咗婚，兩年前仲生埋囝囝Alex，「我哋一家人喺英國劍橋生活，方便我比賽同訓練。劍橋大學好出名，但我又唔會強迫囝囝，佢想打全職桌球都可以，不過會話佢知爸爸讀到15歲就停學打波，要付出同犧牲。」