立法會選舉完畢，直選方面民建聯工聯會充份發揮配票精準策略，成為大贏家，在三十五個直選席位中，得到九席，加上工聯會有四席，呢兩個兄弟黨成為立法會第一大黨，以後梁振英唔俾面佢地唔得。如果計埋啲同路人或傾向建制嘅梁美芬、謝偉俊、葉劉淑儀、田北辰、田北俊，建制派總共有十七個直選議席，創歷史新高。當然，話得說回來，葉劉與田氏兄弟是否真的同梁振英有偈傾，尚有疑問，特別係葉劉在競爭激烈狀況下得30289票，在港島排第六名，每票得來不易，田北俊在新界得31016票排第八名入選，亦係靠自己拉票啫，睇唔到西環有意配票俾佢，佢細佬田北辰在新界西遇上類似情況，故此呢三位女士先生日後是否賣賬，好難講。民建聯工聯會配票功力，在新界西神乎其技，例如譚耀宗、梁志祥、陳恒鑌、麥美娟四張名單，共得票149067，四人全部當選，平均每位攞到37266票，就直入立法會。泛民方面，郭家麒名單，陳樹英加老公李永達，一共三張名單，得130869票，只有一位郭家麒做到議員，其實三張名單平均得票43623，多過民建聯工聯會12%，係輸得冤枉呀。余若薇口口聲聲話自己好想一張名單兩人當選，依家輸咗，冇辦法，其實佢係好想贏嘅。呢句話未必可以盡信，如果佢真係100%想贏，點解唔老早拆開兩張名單，一張自己、一張係郭家麒？兩張名單如果得到現時嘅七萬二千票嘅話，兩人都可以入選，叫麥美娟、梁志祥飲恨，顯見得公民黨在新界西無意之間扮演破壞角色，李永達得32792，只差985票輸俾民建聯梁志祥，多得余若薇唔少，但佢兩夫妻亦唔醒目，如到最後關頭知道唔掂，理應保夫棄妻，將陳樹英的票過俾李永達啦，卒之兩公婆落得回家「對泣」，其擁躉亦傷心。與一位親戚講起此事，佢就話左丁山未見過人地點樣配票，唔可以賴地硬。親戚一位長輩六十歲過外，投票日鎮日不出門等電話，五點幾電話到先至收到指示出門投票。親戚慨嘆話：「民主派只識內鬥，又無堂家姐呢類死忠之士，點可以學人玩配票吖，更且，咁聽組織指示嘅人邊度會成為有獨立思考嘅民主派呢！」