新西蘭可說是全球人口密度最低的國家之一，擁有純淨、自然、無污染的美景，姚子羚早前相約幾位好友離開香港這片石屎森林，坐11小時飛機追尋寧靜國度，同時玩盡海陸空各項刺激運動。
撰文：嵐山
去邊度：新西蘭
玩幾耐：九日八夜
姚子羚天生缺乏運動細胞，但早前跟朋友去新西蘭旅行，卻能玩盡海陸空新奇玩意，令她樂而忘返。子羚說：「估唔到新西蘭有咁多好嘢玩，地方夠集中，幾個鐘頭就去到另一個地方玩。」
子羚最難忘跳降落傘，由一萬五千呎高空一躍而下，既驚險又興奮，她說：「我覺得一生人點都要玩一次！廿分鐘嘅過程，最驚係坐喺飛機門邊一刻，慢慢跣落去，個心直情離一離。之後導師叫我做一啲動作，但風力太大，根本乜都做唔到。」
耳鳴兼頭暈
子羚憶述打開降傘後又是另一番享受，她說：「由高空望落地面，景色好靚，好似雀仔一樣。但之後有後遺症，喺半空時已經有耳鳴，點知返到香港仲頭暈暈，醫生話我未適應，好彩家冇事。」
子羚原本想試玩越野賽車，但因不懂揸車而作罷，惟有轉玩不用能源推動的滑行車，她說：「要先坐纜車上山，之後有三種唔同難度路線滑落山，只要將控制手柄拉一拉就能煞停，都幾好玩。」在新西蘭有不少天然的溫泉及激流，子羚亦動靜皆試，她說：「我有喺當地浸溫泉，可以自己浸一個，好free。之後仲有玩激流，雖然我唔識游水，但今次係喺淺水地方不停轉圈，加上有救生衣，所以都唔擔心有意外。」
