中國桌球手梁文博（圖）一向都鍾意嚟香港，記得佢舊年仲專登租住太古城單位成個月，話方便出街shopping。文博又重臨香江，噚日到尖東一間球會出戰名將盃，喺外圍賽4:2輕取本地小將鄭彥綸。
25歲嘅文博今次就住酒店，而且係5月結婚後，第一次同大佢兩歲嘅老婆陳雪嬌（小圖）來港，佢哋邂逅經過都幾特別。兩年幾前，兩人喺北京嘅英國大使館申請簽證時相識，然後撻着，不過老婆對桌球冇興趣，所以冇到場打氣。
問到會唔會生小朋友，世界排名38嘅文博就話想趁後生，全力喺事業上搏殺，希望下季排名重返前20；佢今晚會硬撼首次訪港嘅澳洲球手羅拔臣，呢位2010年世界冠軍噚日朝由英國飛到香港，由於要適應時差，全日喺酒店休息。