選舉前夕，梁振英卒之就國民教育科讓步，宣佈在佢任期五年內不重推國教科，學校亦無三年推科嘅死線，而且開科與否，由學校自決。咁即係話，不辦者，可以有五年「冷靜期」，要辦者，可以即時開科。五年後怎麼辦？咪睇吓邊位仁兄仁姐會做新特首，還是梁振英連任囉。一早話咗2017有特首直選，家更是必爭之地，假如到時有一位直選出來嘅特首宣佈全港開辦國教科，反對派可以點？憑一人一票直選上任之人，一定覺得自己有選民俾佢嘅mandate，推行起嚟，自然理直氣壯，冇小圈子選舉特首咁膽小。
2017年之特首競選方法，會成為今後三四年之立法會生死鬥，在立法會互罵至你死我活。二十七名當選嘅泛民議員，可說肩負沉重任務，假如佢哋再繼續分裂內鬥嘅話，正合西環心意。
呢次反國教運動，以年青人為主，陳惜姿嘅家長關注組成為意外英雄（Accidental hero），以後香港社會運動史，必然有此一筆記載。講起嚟有啲奇，一啲「老鬼」之中，屬於老右派（反馬列主義），對國教反而冇乜強烈感覺，問心總覺得香港中國人要對中國歷史（特別係現代史）有加強認識嘅必要，即使提及共產黨，亦無相干，唔算係洗腦，但係一啲年青人，新左派、老左派（大學國粹派）就大受刺激，狂熱上街，成為新反共主力。與老朋友講起，好似左丁山呢類自小被教唱「三民主義，吾黨所宗」，小學作文章寫「共匪」可以加分，中六未完已經閱讀台灣出版批判馬克思主義嘅書籍，入大學競選學生會同左傾同學搶選票，為布拉格之春上街嘅人士嚟講，國民教育科係小兒科啦，浸大教材即使使用，如果由我哋嚟教，一樣可以百毒不侵。但今天之年青教師多數對中國認識甚少，對文化大革命過程無認識，唔知馬寅初係邊位，又好難怪佢哋對國教科驚到要死，恐怕被洗腦，因為本身缺乏免疫能力吖嘛！大編輯留意到幾位絕食「老鬼」之中，有一位楊寶熙，係佢同期嘅中大校友，楊寶熙讀聯合書院經濟系，因做過中大學生會會長，在1976年畢業與吳克儉同屆，大編輯記得楊寶熙係中大校園內一名四人幫悍將，熱心參加批林批孔深入批鄧，三十六年後出來反國教，可能已經諗清楚，自己當年被洗腦係幾咁冇意思！