香港係福地，不難食到湘、川、粵菜，但講到「滇藏線上的味道」，我諗十個港人十一個都未聽過。處身「緣生態」露天雅座，坐木枱木凳，吹住凉風嘆自釀葡萄酒，食番件手抓牦牛，味蕾就可以讓你感受一種獨特風味。 文、攝：中行線
「緣生態」主打「滇藏線上的味道」，何謂「滇藏線上」？來自雲南藏族嘅老闆娘話：「即係由雲南去西藏嘅必經之路，又稱茶馬古道，我賣嘅就係古道出產嘅傳統滇藏地方菜。」又滇藏又茶馬，聽到我一頭煙，老闆娘指指牆壁上隨手畫嘅古道地圖，登時叮一聲，明晒！
再望裝修，一邊有三個巨型轉經輪，天花板掛住五顏六色圖案布幅，加埋蠟染燈罩滲透出嚟嘅昏黃燈光，真係好有西藏情調。不過我份人鍾意開揚，都係坐露天雅座舒服啲。
雲南直送食材
咁究竟食乜先？老闆娘：「我哋嘅食材，全部由雲南同青藏高原運來。」先試雲南鮮花餅，嘩！每個人仔五毫子，大大個都不知幾飽肚，入口質感有啲似老婆餅，好香，好好味。「又例如呢碟手抓牦牛肉，用嘅係青藏高原牦牛。」大大嚿肉排，望落幾嚡口，一咬，居然好嫩滑，又無乜羶味，味道勁似港式清湯腩，點埋個調味粉，少少辣仲惹味，呷埋啖薄荷湯，味蕾醒晒！
食得開心，試埋皺椒炒松茸，睇賣相似普通炒菇菌，放塊綠色虎皮皺椒入口，辣到我即打三個乞嚏，「怕辣就淨食松茸啦！」老闆娘拎出一盤新鮮菇菌，有松茸、青頭菌、羊肚菌、雞樅菌、虎皮皺椒、酸木瓜等，「呢啲菇菌全部由西藏直送，保證新鮮，客人可以自己揀，想點煮都得，諗唔掂的話，我會提供煮法。」
自釀野生葡萄酒
講講吓，忽然聞到一股無以名之似臭非臭嘅氣味，枱面多咗碟疑似浸過水嘅苔蘚類物體。「呢啲叫臭菜，炒蛋之後，食落就只有香無臭。」膽粗粗一試，又真係幾鮮味喎，情況一如食柚子皮、榴槤、苦瓜，鍾意食嘅愛死，我接受到，蛋香溝埋臭菜味道，好正。
試埋用新鮮粟米打成汁做成嘅玉米粑粑、用番茄加辣椒做湯底嘅鍋包漿豆腐、牛奶味極重嘅大理乳餅，我真係飽咯。想搵啲嘢濕口，老闆娘話：「紅酒啱唔啱？請你飲番杯嘞。」紅酒我啱，不過，話明滇藏線上，又何來法國紅酒？原來係老闆娘自己釀製嘅野生葡萄酒，釀咗兩年，屬新酒，唔會好辣喉，甜甜哋好醇，「有酒評家飲過，話拍得住葡萄牙出品嘅紅酒。」滴酒不沾者，可以飲藏家酸羊奶，碗上，白雪雪好滑喉，為一頓飯畫上完美句號。
緣生態
地址：深圳南山華僑城西街生態廣場A102號
電話：（86）755-2692 1890
