「波神」米高佐敦06年成為山貓管理層之後，隊波一直越搞越差，上季10.6%嘅勝率仲令呢支夏洛特球隊，成為NBA史上單季最低勝率球隊。隊波屎成咁，近日有傳玩慣老細籃球嘅波神終於醒覺，向老細籃球說不！
山貓上季屎到爆
上季咁羞家令06年成為小股東同球隊管理層嘅米高佐敦，明白自己打波係無敵，不過做管理嘅實力就差得遠。其實唔止上季7勝59負劣績，波神一直喺選秀直接點名嘅做法，都令人覺得咁做有問題。通常聯盟其他球隊都會派球探去大學或者其他地區，觀察球員之後會寫份report畀球隊總經理，等佢去選秀做決定。
不過，山貓就唔一樣，佐敦好鍾意喺選秀揀一啲佢喺NCAA欣賞嘅球員，冇乜太理會球隊有咩需要，令到隊波完全冇領軍人物。2010年成為真正班主嘅佐敦咁玩法，好易揀錯人，就好似06年一個阿當摩里臣（見附表），呢位06年探花用兩季時間都做唔到正選，就已經係天大嘅笑話！
爛攤子留畀總經理
山貓呢啲小球隊，要好似湖人咁玩4條A根本冇可能，所以佐敦以新人去建立球隊；可惜手法唔啱，山貓到頭嚟變咗隻病貓。以單季最低勝率入NBA史冊，終於令佐敦明白，老細波唔係個個都啱玩。試問世上可以有幾多個車路士班主阿巴莫域治？而且做慣贏家嘅波神都講過：「我爭勝心好強，我從來都唔想因為失敗而遺臭萬年。」
醒悟嘅波神已經將管理球隊嘅權力，下放畀總經理邱瑞克。雖然前者只係將啲細嘅處理，但係至少山貓已經向前行咗一步，希望佢哋可以由最廢球隊陰霾走出嚟啦！
