英超嘅比利時球員，近年可謂成為「黃金一代」，高柏尼、華美倫、迪比利等都獨當一面，夏薩特、維頓漢今季都嚟分一杯羹。08年已經加盟愛華頓嘅「爆炸頭」費蘭尼，可以講係呢一代英超比利時兵先驅；不過唔知係唔係唔抵得一眾同胞嘅人工爬晒佢頭，周日無厘頭公開要求離隊，話今季係最後一季踢愛華頓。
「最快下年1月離愛華頓」
比利時人在英超，遠古就有紐卡素後衞阿柏特、維拉前鋒尼利斯等，不過唔算得主流；今時今日就叠馬得多，出戰世盃外24人名單中，英超兵就多達10人，幾乎排得出全英超正選陣咁滯。愛華頓以蔗渣嘅價錢，今季英超開季取得2勝1負，包括首戰已經擊敗曼聯，累積兩個入球嘅費蘭尼都算主要功臣。不過周日返咗比利時進行國家隊練習期間，費蘭尼接受當地報章訪問，竟然公開要求離開「拖肥糖」。費蘭尼說：「我喺愛華頓嘅第5個球季剛開始，亦都係我最後一季。明年一月或者季尾我將加盟其他球隊，甚至其他聯賽。」24歲嘅費蘭尼08年已從安德列治加盟愛華頓，使咗拖肥糖1,500萬鎊（約1.86億港元），係球會破紀錄收購。上年11月越踢越好嘅費蘭尼先同愛華頓續約至2016年夏天，據報愛華頓已經出到同前效阿迪達平紀錄嘅7.5萬鎊（約93萬港元）周薪留佢，都算有晒誠意；而且從現實角度睇，費蘭尼再扭計加薪已經好難。
有機會拖肥糖變紅魔
睇番英超云云比利時兵，高柏尼做埋曼城隊長之餘，上季仲捧埋英超，今季初同球會續約，加薪到13萬鎊（約161萬港元）；不過最厲害都係夏薩特，今季加盟車路士，據報已經有17萬鎊周薪（約211萬港元），以車仔開季3連勝，夏薩特又入波又助攻，要再加薪一啲都唔難。不過費蘭尼嗌走，又有邊隊前列球隊起痰？家要估首推自然係曼聯，事關佢哋中場中路老化，史高斯、卡域克都唔捱得太耐，路爾斯安達臣又浮浮沉沉，得一個湯卡華利有前景；費蘭尼6呎4吋嘅身高，幫到紅魔鬼開路。既然曼聯對愛華頓嘅左閘巴尼斯都有興趣，一次過買埋費蘭尼，可能愛華頓畀番個折扣紅魔鬼。講開比利時國家隊，周二佢哋就會主場對克羅地亞，進行世盃外歐洲區A組第2輪比賽，原本呢個都算係勢均力敵嘅戲碼，仲有匈牙利主場對荷蘭、秘魯主場對阿根廷，都算有啲睇頭嘅比賽，香港兩間電視台都竟然冇得直播；反而播埋啲意大利、英格蘭、法國主場出擊，強弱懸殊之戰，唔通電視台認為香港球迷周中捱夜鍾意睇大屠殺？