樂隊名叫「觸執毛」，古怪繞口，隊員不是長髮紋身就是宅男相，音樂吵鬧搖滾，主音舞姿古怪，遠觀近看都是難指望發達的頹廢青年。
Stop！別讓偏見蒙蔽心眼，原來樂隊五名隊員中有三人吃素，熱愛大自然，更替小學生補習賺錢，但執起樂器就會自動high，曾獲美國《時代雜誌》形容是近年南中國冒起最具魅力的樂隊。對觸執毛來說，搖滾就是忠於自己，近來最Rock的，首推學民思潮的黃之鋒。記者：吳淑義
觸執毛於2005年成立，成員多次變動，08年起保持現有五名隊員，包括主音Jan Curious、結他手Les Hunter、低音結他手Waiting Soul、鼓手Kitty Trouble、結他及鍵盤手Mike Orange。談及名字由來，Jan說：「最初有四人，一人寫一個字，其中一個寫自己個名出局，剩低就係『觸執毛』，拼音係Chochukmo。」
隊員是25至32歲、公屋出身的80後，別人認定窮樂隊無前途，他們要大平反，「喺香港，窮已經唔係樂隊專利，好多年輕人都窮，我哋咪係一般年輕人囉。夾band冇前途？由細聽到大，唔係做律師醫生先叫好，人係有權試其他嘢」。
以歌代言叫吳克儉早唞
玩音樂亦要吃飯，兩名結他手有正職，鼓手教打鼓班，Mike為其他歌手彈奏，Jan除了兼職平面設計還替小學生補習，雖不致餓死，但家人難免擔心。Mike說：「阿媽問我10年後點呀？我話我真係唔知我聽日會唔會死。與其為唔知點樣嘅將來打算，不如為理想打拼。」
看似頹廢青年，但三位成員是素食者，閒來扒獨木舟、游水和露營，又做社區服務，10月25日將到觀塘駿業街遊樂場為有機農墟做開幕表演。本月初在灣仔表演，唱到《Good Night》時高聲說：「呢首送畀吳克儉，叫佢早唞！」
讚黃之鋒貫徹搖滾精神
樂隊風格常被形容是「實驗搖滾」，即係點？「我哋唔理人點睇，只做自己嘅音樂，搖滾精神係對自己誠實，唔理市場要乜，最重要係你想玩乜，做人做事都可以搖滾。香港近來最搖滾嘅係學民思潮嘅黃之鋒，佢搖滾到感動全香港」。
觸執毛的堅持漸得到肯定，09年獲香港版《Time Out》資助發行首張專輯，並獲選為香港的20大音樂人之一；CNNGo封為香港20位矚目的名人之一，歌手王菀之指他們是香港最正的band，陳奕迅更在演唱會推介。
觸執毛稱沒有飄飄然：「有人讚當然開心，但最重要係保持獨立精神，希望可以作為示範，鼓勵多啲人去試。喺香港要做自己都咁難，其實好可悲。」
談到樂隊理想，Jan眼神閃亮地說：「最希望去英國 Glastonbury演出，或者喺外國闖出名堂，回流反攻香港，睇吓政府有乜反應。」Glastonbury是英國夏季最大型音樂節，是頂尖樂手的鬥獸場，站到台上就是受到全世界肯定。