中文大學九間書院迎新，新書院有不同方法，前中大副校長楊綱凱教授自願做一間最新書院嘅院長，原因簡單不過，就係佢敬佩朱敬文（朝欽）先生之教育使命感，希望自中大退休之前，能為一間新書院奠下基礎，發揚朱敬文先生之「修己澤人，儲才濟世」嘅教育抱負。
朱先生並非大富豪，只係一位一九四九年後逃難來港之外省紡織廠廠家，來港後在荃灣經營織造業，賺到錢，一家衣食不愁之後，就在香港比較貧乏之上世紀六十年代開始，每年捐贈獎學金，銀碼不大，但那些年本港學生冇錢留學時期，朱先生之「招生」廣告在「華僑日報」一經刊登，立即招來大量申請者，朱先生逐一挑選，陪入選人到美國領事館辦簽證，親自擔保，陪佢地上飛機去到印第安納州之兩年制學院（即今天社區學院）入學，學生到達後次天即到朱先生安排好之餐館洗碗、碟，賺住宿費用，以後自己半工讀，奮鬥向上。如是者辦到八十年代中期，香港日漸富裕，肯捱嘅學生少晒，朱先生覺得功德圓滿，已為香港盡了他一分力，停辦呢個敬文留學獎學金計劃。
朱敬文先生前後保送咗六百名香港中學生去美國留學，學生不負所望，盡皆有成，不少係MIT博士，成為教授、科學家、工程師，例如香港大學訊息工程講座教授李安國，中華網創辦人/大馬主葉克勇。葉克勇為敬念朱敬文先生培育大德，發起捐款俾中大成立敬文書院，散佈全球嘅六百個Chu Scholars（俗稱朱仔）全部響應。當年左丁山睇華僑日報廣告，都想去申請留學美國，但諗吓自己嘅中學成績麻麻，不敢有所行動，但對朱敬文先生之無私幫助他人之精神（你淨係試吓上美國領事館擔保600位非親非故嘅香港學生攞簽證，就知道幾咁麻煩），一直懷敬佩之心。今年敬文書院收生75人，包括來自南韓、印度、泰國與內地學生；楊院長有新意思，在科學園吐露港岸邊嘅朗廚坊（Ron's Kitchen）辦高桌晚宴招待學生，還請來嘉賓，如前中大校董會主席鄭維健、前精電總裁廖約克博士、科技園行政陳蔭楠及各位院董出席，主要迎新活動就係將學生分為三組送往志願/社福機構實地觀察及寫報告，等佢地多啲了解本港嘅基層生活！