為咗打亂用民調配票者嘅如意算盤，一眾精明選民透過facebook、WhatsApp夾口供講定點樣呃票站調查員。八方將香港研究協會嘅選舉預測對比實際結果，發現出戰超級區議會嘅民建聯劉江華，同新界東龐愛蘭都喺民調被力捧，結果雙雙慘敗；參選港島嘅亡國興同九龍東嘅謝偉俊原本被唱到形勢大好，最後只係掹車邊入局。賽後總結，睇嚟都係新界東選民最蠱惑呀。