美國女球手「細威」莎蓮娜，星期日喺美網女單決賽同白俄羅斯「1姐」艾莎倫嘉打足3盤，最後以6:2、2:6同7:5擊敗對方，繼溫網同倫奧後再下一城。雖然細威經已30歲，但係有15個大滿貫錦標嘅佢，仲想打破德國名宿嘉芙保持嘅22個大滿貫錦標紀錄！
贏艾莎倫嘉奪美網
莎蓮娜呢個冠軍贏得一啲都唔輕鬆，若然唔係全場開咗13個aces，未必可能喺呢場歷時138分鐘嘅比賽勝出，亦都未必可以high爆跳舞慶祝。賽後細威話仲想贏多啲錦標先諗掛拍。佢話：「雖然我已經30歲，但仲會為爭取下個大滿貫而感到好興奮，睇吓自己可以打成點。呢種感覺好正，我好鍾意。贏完倫奧金牌之後再贏美網，呢個經歷真係一世都會記住。」
其實如果唔係04至06年，呢3年間佢受傷患困擾，巔峯狀態大受影響，家世界排名第4嘅莎蓮娜，好可能已經超越咗德國「正手姑娘（Fraulein Forehand）」嘉芙嘅22個大滿貫錦標紀錄。對於要破嘉芙嘅紀錄，細威話：「我從來都冇諗過會同紀錄咁近距離，但係如果我可以打得穩定啲，打多幾個比賽，咁就好啦。如果我可以每年贏兩個錦標，都冇話唔可能，睇吓點啦。」
大把貨賣未諗退休
好多運動員30歲打後，都會開始諗掛拍，不過莎蓮娜就話冇諗過。細威話：「成就呢啲嘢等我真係唔打先諗啦！家我仲有大把貨，仲可以創造更多歷史。」哇，胸有成竹咁嘅款喎，就等一眾球迷放長雙眼睇啦！至於差啲就贏到嘅艾莎倫嘉，賽後坐喺場邊張凳哭成淚人，真係見到都傷心。不過佢都好有風度勁讚對手：「莎蓮娜係最偉大嘅球手，佢將比賽帶到另一個層次。」
女單之前嘅男單4強，塞爾維亞嘅迪祖高域經一日休息後，以盤數3:1反勝西班牙嘅費利，將會喺決賽對梅禮，力爭衞冕。
花絮
美網女單決賽咁大件事，全場坐爆不特止，仲有唔少名宿同名人到場觀戰或做嘉賓，認真星光熠熠。
