雖然話港股交投靜，好多證券行收入大減，但仍然有證券行願意花錢大賣廣告保持知名度。早兩個星期，以低佣金同多自置分店見稱嘅致富證券，就喺中環地鐵站賣成街咁長嘅燈箱廣告，有口痕友估計，致富咁做可能要保持住市佔率，為上市鋪路。
聽廣告界朋友講，喺地鐵站賣14個燈箱廣告，為期一個星期，大概要13萬；如果要揀埋位，10個燈箱要26萬左右。照咁計，致富淨係喺中環地鐵站賣廣告都要幾十萬，都未計同期嘅電視廣告宣傳。
致富太子女周韻姿都話今年係大搞咗，但都係一般市場推廣，公司每年都預咗筆錢做宣傳，目的係想保持知名度，成件事同準備上市無關咁話。咁又係，家個市咁弱，上市呢啲係都等明年個市好番先，家咪吸定客先囉。