立法會選舉塵埃落定，地方分區直選35個席位，泛民只係得18席，建制派就有17席，雙方差距大幅收窄之餘，民建聯配票能力更令人驚嘆。5區共9位參選人嘅得票，全部介乎3至5萬票，啱啱Meet到入場門檻，連主席譚耀宗都估唔到阿爺咁厲害，忍唔住擺出一個欲哭無淚樣。其實大家炒股都要學識配票，不過形式就同選舉相反，如果持股打告急牌（股價急穿支持位），要先沽而後快，寧願將資金配畀有增長潛力嘅股票，即係汰弱留強，如果揸住殘股唔肯止蝕，輸錢之餘機會成本亦好大。
講番股市，經過上周五大升後，噚日係高位整固，但個股亦有亮麗表現，好似機械設備股炒阿爺陸續批出基建項目，普遍都有半成進賬。體育用品股就以安踏體育（2020）最靚仔，升4.9%，收報5.16元。噚日以陽燭突破小圓底阻力，成交亦配合，有力再上，戰友可候5.10元買入，短線目標利潤一成，失守5元止蝕。
唐牛