有「牛下女車神」之稱的港隊單車女將李慧詩，於倫敦奧運勇奪銅牌，旋即掀起港人一股單車熱！今時今日踩單車，唔止可以有益身心，而且仲係一門藝術！從單車款式到配件設計都可以非常講究，追求品味嘅你，無番一兩件新潮實用單車配件傍身，又點踩車呢？ 記者：李曉慧
Tiger & Bunny新衫上畫
潮流興綠色生活，加上政府近年不斷發展單車徑網絡，令單車呢種休閒運動得以發展，連帶配件用品都需求大增！但香港售賣有關產品舖頭實在有限，而且對象多數係花得起錢嘅專業玩家，初入門嘅單車迷想搵較便宜、玩味重的配件，實在相當難度！反觀外地好多先進地區，一早鼓勵國民以單車代步，市場夠大，產品選擇自然多，所以轉投外國網站直接入貨，絕對係聰明之選。
大熱天時着Tee踩單車，有幾熱、幾辛苦？唔講都知！呢個時候你就需要一件通風排汗戰衣！市面上的單車衫夠晒專業實用，但除咗顏色唔同之外，一般都無咩花款。其實單車衫嘅可塑性非常高，好似日本就有設計師將單車衫同英雄人物Crossover，做到排汗效果之餘又夠特別，男孩子一定愛不釋手！
購買網站：
a. http://www.club-gcd.com/shopping.php
b. http://www.chainreactioncycles.com/
c. http://www.taobao.com
價錢分類 單車百貨
如果你係非常熱愛單車運動嘅單車迷，想必你一定聽過Wiggle呢個網頁！Wiggle可以說是單車界的網上百貨公司，擁有十多年單車用品網上銷售經驗，在單車界享負盛名，夠晒信譽！
一登入網站，佢就馬上問你產品結算選擇，例如有人民幣、台幣、美金、英鎊等，雖則未有港幣，但感覺已非常窩心；單車產品及牌子選擇亦非常多元化，特別要讚嘅係Wiggle設有根據價錢高低搜尋貨品功能，搵心頭好就更加方便！而且買滿某個價錢，網站仲會提供免費國際送貨，大概一星期就可以收到貨！
購物網站：
d. http://www.wiggle.co.uk
日本Blue Lug 搵小配件
Blue Lug是日本著名的單車舖，一向致力推動單車文化，代理各地知名的單車用品品牌，近年還發展出自家品牌Blue Lug Originals，將日本傳統特色、工作、滑板等多元文化結合，設計出突破傳統單車框框的高品質用品。香港雖然無Blue Lug分店，不過你可Click入官網購物！
購物網站：
http://bluelug.com
網上度身 買最啱使單車
唔好睇小單車呢種交通工具，只係靠住車手體力同埋兩個轆，要穿州過省，攀山涉水都唔係問題，不過單車性能各有不同，最重要揀啱自己需要！建議大家首先從三方面：速度、功能、安全作考慮。
若果只係一般悠閒用途，可以選擇花款多、車速不快，比較安全的普通單車；玩Mountain Bike的朋友就要從安全及性能出發；公路單車則着重速度！各款單車的車架大小、座墊高度計算方法都不同，小記發現了一個分類計算網頁，大家可以先計吓適合自己的尺寸，咁就唔驚買錯車啦！
參考網頁： http://www.51mtb.com/article_view_89.htm