立法會選舉曲終人散，有人歡喜有人愁。首次參選港島直選「事旦男」何家泰就灰爆，就算除cap帽、撕口罩露真相，都只能以343票榮膺倒數第一，票數仲要全港最低，5萬蚊選舉按金肯定凍過水。
林依麗有進步
事旦男同八方呻，以為起碼有1.5％選票，點知大跌眼鏡，又慨嘆香港人都係選有知名度嘅人，下屆唔敢再玩。今屆向鼠王芬窮追猛打嘅林依麗，雖然以859票冧莊低票之后，但已經比起上一屆多出近300票，都叫做有進步嘅。八方仲記得佢喺今屆電視論壇上狂呼「梁美芬呃市民」，獲唔少網民激讚。希望佢下屆再參選，畀選民睇真牛鬼蛇神。