零政治觸覺的胡杏兒前日為挺民建聯成員姐夫鄭泳舜，親自「落區」嗌咪拉票，最後姐夫落選之餘，更惹來網民狂插，賠了夫人又折兵的杏兒，昨日在活動上強調只是撐家人，更直言是「終極一撐」，下次會知避忌。
國民教育事件掀動不少香港人的情緒，再加上立法會選舉的敏感時刻，胡杏兒在前日的選舉投票日，現身深水埗街頭，為代表民建聯競選今屆立法會九龍西議席的鄭泳舜落區拉票，事後，她更把與家姐胡可兒及姐夫的合照放上微博，旋即引來大批網友狂插，有網友對杏兒為民建聯站台感失望。
只想支持家人
昨日杏兒在銅鑼灣出席鞋履活動時，再三強調自己只為撐家人，她說：「冇諗過大家反應咁大，我只係想支持屋企人，我姐夫喺深水埗做咗幾年，見到佢好用心幫助弱勢社群，我只係用心支持，冇諗過政黨問題。唔會為難咗我，下次會避開，唔想掀起罵戰。」問她是否不夠政治敏感度？杏兒說：「好難絕對話幫邊個，出發點都係支持姐夫。」至於有網民表示不會再選她做視后？她希望大家可以分開兩件事，但唔太擔心：「要講都講咗。」
今次終極一撐
杏兒承認自己沒有危機感，但沒有因此事不快，至於以後是否繼續支持姐夫？杏兒謂：「今次係終極一撐！」似暗示要劃清界線，但隨即又說：「我真係覺得姐夫好用心，佢根本唔需要做呢份工㗎！」不過力挺之後又反問記者：「係咪應該低調啲呢？下次家姐撐得啦！」
至於C奶神獸天使劉蔚萱被導演張永豪用膠袋笠頭，杏兒表示沒有跟張永豪合作過，但她認為應該憐香惜玉，直言入行時亦曾被罵，她說：「點都有鬧但唔過份，新人被鬧幾句係正常，但係粗暴就未試過。」採訪：林嘉慈 攝影：陳慧安
