好多人知道蘇民峰師傅炒舖唔炒樓，近日同佢傾開，連佢都話家陣啲舖買唔過，「成億買個舖，十萬都租唔到。」佢於是走咗去睇樓，諗住買番個單位收租，上月尾睇中一間全馬場景嘅單位，落埋訂，點知去完旅行返嚟個業主退訂，賣咗畀第二個，搞到蘇師傅冇哂癮。
蘇師傅話，上月尾睇中一個3000幾萬、實用面積2200方呎嘅全馬場景單位，落埋訂，點知上星期去完旅行返嚟，就收到業主通知，有另一位人兄出多幾百萬搶個單位，業主即刻退訂唔賣畀蘇師傅。
好似話，呢個單位放咗成年都冇人買，唔知點解蘇師傅一話買就有人搶。一係就有人見到蘇師傅睇完之後即買，以為風水一定好，唔搶就笨。再唔係，就係買家認為CY推「梁十招」穩定樓市無料到，樓市只會繼續升，一於衝入去掃貨先，實行盲搶樓。