上個禮拜，歐央行終宣佈救市計劃。關鍵嘅條款同孫柏文之前喺《金手指》預測一模一樣。雖然估中內容，即係冇料到，不過市場喺計劃宣佈後嗰日，即上個禮拜五以大成交勁升。無他嘅，市場參與者就咁捉住計劃中講話會無限量咁買啲要被拯救國家嘅債券，見到「無限量」喎，仲唔買、買、買！所以羊群結論係：「今次除非冇瞓身，如果唔係想窮都難啦！」
冇限額卡只可還卡數
點知原來羊群都唔係次次上當，因為呢個勢去到噚日已經停車，點解？因為就算你可以唔理歐央行出嘅每一毫去買債後，要喺市場吸番走晒，你都唔可以唔理計劃最關鍵，即係我重複再重複話攞錢時，被接濟嘅政府要喪失主權。啱啱過咗嘅周末，好多人好似我咁問：「如果咁筍，冇限額嘅附屬卡，點解未有人攞來碌？」
這亦解釋點解差唔多所有歐央行委員支持，因為根據我啲歐州搞自由市場智庫嘅針，家最「支持」呢個救市方案嘅委員，就係以前好反歐央行救南歐嘅荷蘭央行行長。點解？因為佢原來已經睇唔過眼啲南歐人嘅政策好耐，特別係勞工政策。乜唔可以炒人呀，五十歲攞全民退休派錢呀，通通會喺南歐國家求救後，被取消。
聽聞話荷蘭央行行長想為呢啲國家做嘅改革、開放措施，成本電話簿咁厚。冇限額嘅附屬卡，不過乜都唔買得，唯一用途，就係攞錢還以前啲卡數，畀你，點會攞呢張卡？
冇錯，南歐債息係跌。不過4月5日篇金手指，我提供過點炒歐州救市消息嘅簡易流程圖，大家可以上蘋果網下載。如果跟呢個圖，沈振盈沈大師上周話股市大跌嘅預測完全合理，我身體力行撐大師，今日下午三時加碼買恒指熊證！
最後，《金手指》將會由一周兩次變每周星期二刊出一次。
孫柏文
獨立股評人
http://facebook.com/shuen
本欄逢周二刊出