【本報訊】「爸爸，點樣先至可以將啲資料由舊機搬落新機度呀？」手機連鎖店衛訊近期播放的出位廣告，一名好爸爸為解決囝囝「搬資料到新手機」請求苦無對策，最後幸獲衛訊員工不厭其煩解決。不過有市民向《蘋果》踢爆，原來到衛訊的搬手機資料服務，教學收費每小時高達200元，廣告卻絕口不提，大有掠水之嫌。
記者：馮詩媚、陳兆剛
廣告播出後，不少遇到同樣疑難的市民喜孜孜拿着手機，到衛訊門市要求獲得相關服務，卻換來一肚氣。「廣告包裝到佢哋好似良心企業，以舉手之勞換嚟正面形象，點知佢哋唔止係全港獨家提供過資料服務，仲係全港獨家收錢，激死人。」
上星期，《蘋果》拿着兩部不同型號手機，到各大電訊公司詢問手機搬資料問題，得悉百老滙、蘇寧及豐澤等都未有此服務提供。至於大賣廣告標榜此服務的衛訊，職員卻帶記者到門市一角，拿出一份收費表，猛落嘴頭叫記者「交學費」。
開班收200元一小時
「如果想我哋幫你將手機資料搬去另一部機，唔過16GB或一個鐘頭內完成收100元，過咗再另計。其實你想學部機點用，不如選擇上堂！教晒你安裝軟件，每堂同樣100元。當然，想準確啲學你想知嘅嘢，最好就係單對單教授，學費200元一個鐘。」
記者指廣告從未提及收費，如今開班收錢「係咪呃人」。職員坦言不少客人問及相同問題，承認廣告或惹人誤會；他續稱若手機經由衛訊購買就不用付錢上堂。但另一位職員此時卻搭嘴說：「廣告亦冇話唔使錢呀！」
記者支付200元上堂，發現自稱阿sir的客戶服務員既無課程編排，每條問題都由學生提問。阿sir還說：「其實邊會講到一個鐘咁耐呀！呢啲課程係畀啲完全唔識、由傳統手機轉用智能手機嘅人學，都唔明點解你要上堂！」
對於顧客批評，衛訊沒有正面回應，只重申一向有為在衛訊購買新機的顧客提供搬資料服務，今年才將該服務延伸予非衛訊顧客，但他們須付指定的服務費，而收費已於衛訊各門市列明。
