喺無綫劇《巴不得媽媽…》有性感演出嘅岑麗香瞬間變宅男女神，人氣升咗是非自然跟住嚟，最近有傳香香拍呢套劇時成日姣劇中男友錢嘉樂，仲要嘉樂成日管接送，搞到陀住嘉樂骨肉嘅湯盈盈唔多高興。
洲際酒店擺50圍
嘉樂噚日喺天際100幫電影《寒戰》宣傳時，好平靜咁話：「相信老婆（盈盈）同觀眾都唔會信呢啲謠傳，我亦唔會因為驚老婆唔開心同啲女仔保持距離。」嘉樂仲透露11月應該會喺洲際酒店擺酒，開足50圍都冇走雞。
馮仁昭噚日打咗電話畀香香，佢就話：「話我姣嘉樂有啲唔開心，冇啲咁嘅事。」佢仲話嚟香港工作係想學嘢、豐富人生，之前學功夫時知道嘉樂係佢同門師兄，所以希望大家唔好亂講。好彩香香一向充滿正能量，唔開心一陣就冇事，仲話會繼續加油。至於養緊胎嘅盈盈喺微博擺咗同香香嘅合照，留言話：「岑麗香是我《明珠生活》的好拍檔和好朋友。Love You Eliza！」用行動證明相信老公同香香。
