雅天妮（789）主席謝超群疑似精神病入院，佢老婆葉英琴變成話事人，噚日公司喺寫字樓開股東會，吸引30多位傳媒朋友走去採訪，但葉英琴話唔見人真係唔見人，只派位怕怕醜醜嘅公司秘書出來，交低句「運作冇問題」咁嘅行貨就算。
市值得兩億嘅雅天妮，好似無乜股東關心，只有三數位小股東出席股東會，仲要好驚青，開完會出來奪路狂奔，甚至有人衝去後樓梯撞開防盜門，搞到警鐘響足成分鐘。揸住十幾萬股（約值兩萬）嘅尹先生就好淡定，相信公司一定無事喎。
三催四請下，雅天妮先派公司秘書覃家寶出來講幾句行貨，指謝超群仍然係公司主席，未畀人罷免，亦未聽過有人要申請公司停牌，總之公司運作無問題咁話。睇嚟，呢單嘢有冇下文要睇主席幾時出院嘞！