異動空間:宏橋有力衝多浸 - 魏力

異動空間:宏橋有力衝多浸 - 魏力

選舉賽果令人唏噓,泛民比保皇黨多取30萬票,但只多取1席,一向高呼取消功能組別的泛民,今次竟要靠功能組別先湊夠27席,戰友笑言睇怕佢哋以後都要轉軚支持,否則可能更難取得議席。
泛民不是輸票數,而係未能有效分配選票,等於炒股唔睇值博率,資金配置失誤,押大注的股份被套牢,又唔及時換馬,升的就買得雞仔注,咁點樣賺大錢?保皇黨一車車送公公婆婆去投票,又禮券又「掌心雷」的招數固然可恥,但玩得呢個選舉遊戲,不先取到議席,又如何在議事堂發聲?希望泛民檢討策略,不要再浪費支持者手上的選票。
講番個市,上周五爆升後出現正常整固,成交仍有500多億元,反映承接力不俗;A股成交亦由1000億人仔,急升至1800億或以上水平,相信是大戶靜靜進場掃貨了。
內房及資源股動力佳,昨日推介的保利置業(119)升勢持續,今日揀隻落後鋁業股中國宏橋(1378)。過去半年,宏橋市值唔見一半,但業績非想像般差勁,純利僅微跌2%,現價預測PE唔夠3倍,較同業中國忠旺(1333)折讓65%,預測息率亦達9厘,防守性不俗。走勢上,宏橋低位大成交連彈兩日,升勢漸成,有望回補5月的下跌裂口4蚊左右,水位22%。

魏力
http://www.facebook.com/2012jason