校友會午餐例會搵到專家M講釣魚台與中日關係，兩國會唔會打起嚟，報名參加者竟然唔多踴躍，不過當時有校友未報名就走上酒樓，於是開夠三圍，與預期差唔多。午餐演講題目好難揀，在選舉前講競選，因有不少校友參選，一時出言不慎，容乜易引起是非？潮流文化興去廉記告狀，乜嘢小事都去投訴一餐，小事往往無限化大，我地無謂攞嚟煩。又講股市、樓市呀？悶唔悶啲呀，唔係次次要講點樣搵銀嘅啫，一位校友話點解唔講國民教育？左丁山回答：「釣魚台事件就係活生生國民教育，影響整個亞太區和平穩定，香港國民教育在小學撤回也好，分三年推行也好，外面世界無人關心，釣魚台先至係真正國家大事，世界大事及活生生嘅國民教育。」
專家M留學日本，研究中國，對中國與日本民情嘅認識比我地深厚得多，一企起身就講到滔滔不絕，答問題有條不紊，見解精闢，大家聽出耳油，講到下午二時十五分，竟然無人要走先去返工，要左丁山喝一聲：「返工嘞喂！」眾校友先至依依不捨咁離開。一位大銀行證券研究董事第一次出席，猛話演講咁精彩嘅，得益良多！點精彩法，專家M話明唔准寫，左丁山唯有就此打住。一位中醫博士校友唔駛趕住返工，捉住專家M猛咁問，要左丁山勸開：「M先生還要下午返工㗎。」中醫博士居然講：「冇嚟參加聽講嘅校友真係走寶，不如下次午餐例會再搵M先生講下集！」
與M先生坐地鐵返回中環，在車站拜拜而別，返到公司，收到讀者電郵大駡左丁山嗰篇「歡迎自由行」，有人鬧唔奇吖，獅子山學會皮蛋王睇完已提警告：「你想俾人鬧咩！」我地係自由派，站穩原則，那怕批評，讀者E話：「香港實行一國兩制，行政司法獨立自主，何來有義務地保障內地人自由地來分攤本地資源呢？」無錯，香港係特區，司法獨立自主，但同時係中國領土，中國管晒軍事外交，但中央如果不准美國人日本人來中國（例如發生釣魚台爭奪戰，美國幫日本嘅話）香港那得不從？如中央放內地人來港，你又信香港可以拉閘關門？你估香港係新加坡咁嘅獨立國家咩。他日假如中國有民主選舉，統一台灣，中國人民有充份行動自由嘅話，香港唔通唔俾13億內地人來購物旅行？