汪明荃（阿姐）、錢嘉樂、羅仲謙同黃智雯一班無綫劇集《巴不得媽媽》嘅演員，噚日喺將軍澳做宣傳，呢齣劇早排拍嗰時已經傳阿姐同另一位阿姐黃淑儀不和，咁啱今次搞宣傳又唔見咗黃淑儀，唔通真係一山不能藏二「姐」？不和傳聞係真嘅？噚日阿姐講起呢單傳聞，好勞氣咁話：「佢（黃淑儀）喺加拿大，唔通特登買張機票飛返嚟做宣傳咩？呢單舊聞翻炒又翻炒，仲要拎出嚟再講。」
嘉樂學抱B
雖然少咗黃淑儀，但仲有成大班藝員撐場，一樣咁熱鬧。玩遊戲時錢嘉樂搞搞震，阿姐做評判，畀咗扮乖仔嘅羅仲謙贏，嘉樂即刻窒阿姐：「阿姐專揀靚仔，睇你揀羅家英就知。」阿姐即回應：「使乜講！」嘉樂就嚟做爸爸，但依然咁貪玩，同場嘅趙希洛帶咗隻狗仔上台，嘉樂爭住抱，手勢好似抱B咁，相信佢都想練習吓。嘉樂話湯盈盈預產期係下年3月，睇過張超聲波，個BB郁手郁腳，不過嘉樂話：「重要部位重疊咗，所以暫時未知仔定女。」睇怕佢都係想玩神秘多啲。