內地女星張雨綺同導演老公王全安合作嘅電影《白鹿原》上映，兩公婆近排喺內地四出宣傳，日前佢哋同演員段奕宏等出席學校分享會，其間張雨綺經常用手遮肚，佢身材亦明顯有啲發福，難怪有人推測佢可能已懷有身孕。另外，張雨綺當日宣傳時亦有講到造人大計，佢大讚老公王全安好啱做爸爸，而王全安就話忙完之後，就會仔細考慮生仔問題。