去年狀態「弗」爆嘅胡兆康（左），噚日喺九展舉行嘅亞洲保齡球錦標賽，同師弟麥卓賢、曾柏期、曾德軒、楊偉基齊心合力，以6,427分力壓衞冕嘅南韓，歷史性勇奪男子5人隊際賽金牌！
港隊完成首輪比賽後，一度落後南韓96分，但次輪越戰越勇，5人每局平均得分都超過200分，反而南韓就有唔少失誤，結果香港成功後來居上奪得首金。康仔喺過去幾屆亞錦賽都有好成績，共贏過兩金兩銀。對於首次奪5人隊際賽金牌，康仔話，「呢塊金牌意義好大，係全班兄弟一齊合力贏嘅，我哋賽後仲食燒味飯慶祝。」康仔今明兩日乘勝追擊，聯同麥卓賢、曾柏期以及曾德軒出戰精英賽，有力再為港爭光。