《銅鑼灣》
黃又南同徐天佑早排重組Shine開騷，令又南人氣同工作量都大增，前晚11點半，又南揸住部紅色Audi喺銅鑼灣出現，佢身邊仲有前無綫女導演郭家萍，聽聞郭家萍家都有幫歌手拍MV，唔知佢兩個見面係傾合作抑或真係出街約會。
危險倒車
認路麻麻嘅又南，將車駛入恩平道之後發現行錯路，竟然罔顧安全倒後行咗成半條街，跟住佢喺銅鑼灣兜咗幾個圈之後，去咗景隆街一間電訊公司買太空卡同電話套，佢買完上車搞咗一輪後，又同郭家萍落車去咗附近影碟舖買影碟。
最離奇嘅係，又南買完碟之後叫郭家萍上車等佢，佢自己就行咗去附近告士打道邊打電話邊等人。冇幾耐，一部灰色私家車駛埋去又南身邊，又南鬼鬼祟祟咁上車，5分鐘之後，又南一邊落車一邊攝番啲銀紙入銀包，落車嗰陣又四圍，好似好驚俾人發現，認真耐人尋味。跟住又南開車同郭家萍去咗北角嘅科滙中心，記者等咗好耐都唔見佢哋離開。
採訪、攝影：楊浩賢、朱志聰、羅德光
