最近幾日與親戚朋友講九月九日星期日立法會選舉投票,原來仲係有人矇查查,一位教師話:「我有三票噃,一票直選,一票教育界功能組別,一票超級區議會!」另一位會計主任話:「乜呀?我得一票啫啩,淨係投超級區議會啫噃!」
幾乎俾佢兩位激親,唯有向佢地解釋,一個選民最多只有兩票,你係教育界功能組別選民,就不能投超級區議會;另外投票時,人人都可以拿到兩張選票,要分得清楚,不可亂嚟。佢兩位聽完,即刻鬧政府宣傳不足,蒙蔽市民,左丁山唯有苦笑,教師咯喎,仲樣樣賴政府不力,自己平時冇睇報紙,冇留意時事嘅咩,駛唔駛叫政府教你投票俾邊位候選人呀?
解釋一輪,十幾二十人飲茶時七嘴八舌,討論如何投票,大家來自不同選區,五區有齊,競選名單令人眼花撩亂,總之各有所好啦,無謂堅持一定要投俾呢個那個,但傾傾吓,大家傾出一個原則,就係為咗香港民主前途,要盡力投俾民主派,但亦有人講:「喂,香港係資本主義社會,立法會要有啲資本家議員平衡吓嘅,大家不可忽略!」講得不無道理,但資本家參選,亦要佢地有從政經驗,有過直選經驗至得,唔通求其揀個有錢人咩。
至於全港選民可以一齊投票,不分區嘅超級區議會候選人,一共有六位,就係民主派嘅何俊仁、涂謹申、馮檢基,工聯會陳婉嫻、民建聯劉江華與李慧琼,還有無黨派白韻琹,投俾邊個,意見單純,一致認為根據民調,工聯會陳婉嫻一定當選,可能吸票多得滯,佢嘅支持者會自動配票俾劉江華、李慧琼,令民建聯工聯會全取三席都唔定,民主派選民如果唔踴躍投票或誤聽人言,唔投超級區議會選票嘅話,就會有此後果。民主派三人之中,根據滾動民調,涂謹申最牙煙,隨時會輸俾識得分配選票嘅工聯會民建聯,俾劉江華李慧琼砌低。阿涂真係一票不能少,佢食粥食飯要睇閣下手上一票咯,唔怪得佢曾經在蘋果日報賣廣告告急啦。睇民調與過往配票策略,陳婉嫻、劉江華、李慧琼三人一起進入立法會嘅機率甚高。(交稿之後,收到一位讀者李伯來函,佢話本欄句句淺白易明,希望投票前解釋吓乜嘢叫做「超級區議會」選舉,佢最近睇報紙報導,覺得長夾臭,睇極都係矇查查喎。希望上文對你有啲幫助。)