別放棄表態權
彭浩翔（導演）：「（身在台灣宣傳電影）今日專誠回港，就係趕返嚟投票，點解要投白票呀？白票即係放棄你選民嘅權利，咁同冇去投票有乜分別。投白票會益咗啲有鄉親票同團體票嘅候選人，所以最好跟番自己選擇去投票。」
投白票無成果
潘源良（著名作詞人、導演）：「我唔認為投白票會有任何成果；既然超級區議會（政改方案）當初出爐，冇人有任何意見同行動反對，所以我寧願根據遊戲規則，根據自己意願選心目中嘅人選，睇下佢喺議會表現成點，至決定下一次意向好過。」
決定香港前途
陳方安生（前政務司司長）：「泛民主派嘅支持者，一定要去投票、一定唔可以投白票，因為投白票，就等同投票支持保皇黨、建制派；泛民一定要喺新一屆立法會攞到至少24席，先至可以阻止梁振英為所欲為；香港前途會係點？就決定喺香港人手上呢一人兩票。」
保24席阻23條
張同祖（導演）：「我一定會去投票，仲會呼籲其他人：投白票係好有問題。點解要投白票先？假如泛民冇24席，建制派要提出通過23條，你有冇辦法可以阻止呢？一切恩恩怨怨，喺呢個關鍵時刻，我覺得係唔適宜再講。你先要保24席，就係咁簡單。」
含淚投畀泛民
周博賢（音樂創作人）：「超選泛民候選人只有民主黨（何俊仁、涂謹申）同民協（馮檢基），我唔想投白票，因為會益咗建制派，所以我會含淚投畀泛民。我都希望其他選民就算點唔鍾意民主黨或民協，都要投畀泛民，千祈唔好投白票。」
